Projekti është një ndërtim P+0/strehë i destinuar për gratë e abuzuara që përjetojnë dhunë të ndryshme fizike dhe psikologjike, i cili do të ndërtohet në fshatin Frashër në periferi të qytetit të Mitrovicës. Dizajni i ndërtesës është projektuar në funksion maksimal për përdoruesit/pjesëmarrësit e saj, konkretisht për gratë e abuzuara, duke iu përmbajtur rregullave të dizajnit/teknikave për objektet e banimit/strehës.

Orientimi i hapësirave të përbashkëta është në juglindje dhe hapësirat e gjumit janë në jugperëndim. Ndërtesa është e destinuar për 28 persona/gratë, përfshirë fëmijë dhe persona me aftësi të kufizuara. Kjo ndërtesë, për shkak të karakterit të saj, ka një privatësi dhe orientimi i saj mundëson që gratë, banoret e kësaj ndërtese, të kryejnë aktivitetet e tyre pa u vënë re nga fqinjët dhe vizitorët e lagjes, apo edhe nga abuzuesit e tyre. Përveç pjesës argëtuese të hapësirave për lojëra, janë planifikuar gjithashtu hapësira për aktivitete të ndryshme, gjithashtu është planifikuar një serë për kultivimin e ushqimit ose luleve për t’u ndjerë sa më produktivë dhe për të larguar vëmendjen nga ato që kanë përjetuar më parë, por gjithashtu për përfitime personale financiare.