Projekti është zhvilluar duke u bazuar në funksionin kryesor të dy ndërtesave: Arkivit ndërkomunal të Gjilanit dhe administratës së tij. Dy volumet, të ndara fizikisht dhe të formës kubike me gjeometri të rregullt, përfaqësojnë qartësinë funksionale dhe sigurinë e kërkuar për një arkiv. Forma e tyre kompakte theksohet nga elementët lidhës – si ura dhe shkallët emergjente – të cilat janë në funksion të dy ndërtesave.

Dy volumet lidhen vizualisht përmes profileve dekorative prej alumini, që krijojnë një harmoni kompozicionale mes tyre. Shkallët emergjente, të lyera në ngjyrë të verdhë, vendosin një kontrast të gjallë ndaj fasadës monokromatike, duke i dhënë ansamblit një identitet bashkëkohor dhe dallues.